Muestra del meyor arte románicu asturianu ye l´ilesia de Santa María de Villamayor, de la que l´ábside y una portada llateral ye l´únicu restu constructivu conserváu del monasteriu del mesmu nome.
      Románica yera tamién la primitiva ilesia de San Xuan de Berbíu (portada oeste), anque mui reformada nel sieglu XVIII y, que tuvo n´estáu de ruina hasta la so reciente restauración.

      D'época medieval ye tamién la ilesia de San Pedro de Belonciu, anque ´l so aspectu orixinal alterose por numeroses reformes. Otres munches ilesies del conceyu conserven elementos de mayor o menor interés arquitectónicu con feches que tan ente los sieglos baxomedievales y modernos, como les ilesies de Ques, Cereceda, Sorribes, Lodeña, Borines o Espinaréu, hasta l´actual centuria, na que s´atopen la parroquial de San Antoniu en L ´Infiestu o l´edificiu neobarrocu de San Pedro de Villamayor.
      D´arquitectura civil hai tamién munches por cuasi toles parroquies del conceyu numeroses casones y palacios, que se fechan ente los sieglos XVI al XVIII. Dalgunos exemplos son la Torre del Omedal (Miyares), la torre de Lodeña, el Palaciu de Sorribes, el Palaciu de Cutre (La Goleta), el Palaciu de Rubianes (Cereceda), el Palaciu de les Fuelgues (Villamayor).
      Numerosos son tamién los exemplos d´arquitectura indiana que hai nel territoriu piloñés.
      Ye importante pola so singularidá, la piscifactoría (tercera de toa España) que s´atopa n´El Orrín, a la salida de L´Infiestu. Na actualidá hai proyeutos pa rehabilitala y da-y usu públicu.
      Nos sos límites pue güei disfrutase d´un conxuntu mui variáu d´árboles centenarios qu´apaez reclamar la creación d´un xardín botánicu.
      Hai tamién en cuasi tolos pueblos numeroses construcciones de calter popular, colos tradicionales corredores de madera. Espinaréu conserva un valiosu conxuntu de hórreos y paneres. Culturalmente, Piloña siempre foi un enclave mui activu.
      Dende que na Edá Media foi zona de pasu de la ruta xacobea que diba hacia Santiagu de Compostela, hasta l´actualidá na qu´asociaciones culturales (Pialonia) y deportives (Grupu de Montaña Vízcares) faen actividaes festives y culturales durante tol añu.