|
|
|
|
Piloña
limita al norte con Villaviciosa y Colunga; al Sur con Casu,
Sobrescobiu y Llaviana; al este con Parres y Ponga;
y al oeste con Nava y Cabranes. Forma parte de la Mancomunidá
de Municipios d´Oriente d´Asturies. Dende´l puntu
de vista orográficu ´l so territoriu ye mui variáu,
con zones suaves na parte central que se tresformen en laderes y cuenques
apretáes nel norte, coincidiendo especialmente cola falda meridional
del Sueve; nel sur los valles son allargaos y estrechos, con sectores
de media montaña cuayáos de praos y bosques.
El conceyu cuenta con dos árees catalogaes dientu de la Rede Rexonal d´Espacios Protexíos de la Sierra del Sueve y la Reserva Natural Parcial de la Cueva del Sidrón; esta segunda tamién ta declarada Bien d´Interés Cultural,... |
 |
El so cursu fluvial
más importante ye ´l Ríu Piloña, que cruza
la demarcación d´este a oeste. Los sos principales afluentes
son, pol sur, los ríos Tendi, Color, Pequeñu, Valle, Espinaréu
y la Marea, pol norte, el Borines y el Pintueles.
Les víes de comunicación del conceyu, amás de los Ferrocarriles Económicos, articúlense a partir de la carretera N-634, qu´atraviesa ´l conceyu d´este a oeste, al empar que la citada llínea férrea, discurriendo les dos de forma cuasi paraleles. Hacia ´l norte arranquen- les autonómiques AS-255, que va hacia Villaviciosa, la AS-258 y la AS-259, que van a Colunga, y l´AS-332, qu´une l´AS-258 con Villaviciosa, y hacia ´l sur destacan l´AS-254 a Campu de Casu y l´AS-339 a Ponga. |
|
La economía
de Piloña ta diversificada y colos tres sectores
bien desarrollaos. D´ellos el primariu cubre namás un cuartu
de la producción global, enfocáu sobre too a materies primes
como lleche, carne, mazanes y ablanes, xunto a la esplotación forestal
y piscícola. Nel secundariu tienen gran pesu los productos alimenticios,
representaos poles factoríes de tresformación de llácteos
en Sevares, y les d´embotelláu d´agua mineral de Borines
y Ques. Pero llogren mayor protagonismu´l comerciu, la hostelería
y los tresportes, que convierten el sector terciariu nel principal xenerador
de riqueza del municipiu.
|